2023 წლის 7 ოქტომბერს, ისრაელის დროით 6:30 საათზე, ქვეყანა განგაშის სიგნალმა გამოაღვიძა. პერიოდულად, ისრაელში მცხოვრებთათვის დილა ასე იწყება. კონფლიქტი, რომელიც 17 წელზე დიდი ხანია გრძელდება, ადამიანებს ორივე მხარეს მუდმივი საფრთხის განცდით, დაძაბულობაში ცხოვრებას აიძულებს. მოულოდნელი თავდასხმები, საპასუხო შეტევა, ნგრევა, საცავებში ევაკუაცია, ჰუმანიტარული კრიზისი, მოლაპარაკების წარმოების მცდელობა, დროებითი ზავი და ცეცხლის შეწყვეტა და ისევ, ხელახლა დაწყებული შეტევები. ასეთია ახლო აღმოსავლური კონფლიქტის უწყვეტი ჯაჭვი. 

თუმცა, 7 ოქტომბერს, ებრაელებზე, ჰოლოკოსტის შემდეგ ყველაზე სისხლიანი თავდასხმა, მაინც მოულოდნელი აღმოჩნდა. პალესტინურმა ტერორისტულმა დაჯგუფება ჰამასმა ერთდროულად განახორციელა სახმელეთო, საზღვაო და საჰაერო შეტევა. 

თავდასხმას 1200 ადამიანი ემსხვერპლა, 240 კი ტყვედ იქნა აყვანილი. შეტევისას ერთდროულად 2 200 საჰაერო რაკეტა გაუშვეს (უპრეცენდენტო რაოდენობა) ისრაელის ქალაქების მიმართულებით. განსაკუთრებით წარმოუდგენელი იყო სახმელეთო თავდასხმა. საზღვარი დაახლოებით 1500-მა სამხედრომ გადაკვეთა. შეიჭრნენ მუსიკალური ფესტივალის ტერიტორიაზე, თავს დაესხნენ საზღვრისპირა კიბუცებს. 8 ოქტომბერს, პირველად 1973 წლის შემდეგ, ისრაელის სახელმწიფომ ოფიციალურად გამოაცხადა ომი. 

ღაზას კრიზისს, დღემდე არაერთი ისრაელელისა და პალესტინელის სიცოცხლე შეეწირა. ღაზაზე ისრაელის საპასუხო შეტევის შედეგად, გაეროს ცნობით 5000 ადამიანი დაიღუპა, მათ შორის 60% ქალები და ბავშვები არიან. გაზას სექტორში სხვადასხვა ცნობით, 1.7 მლნ იძულებით გადაადგილებულია. თანამედროვეობის, ალბათ ყველაზე წინააღმდეგობრივი კონფლიქტის ცხელ ფაზაში გადასვლამ, სენსაციურმა გაშუქებამ მედიაში, გააძლიერა საკითხზე მწვავე დისკუსია მთელ მსოფლიოში. სოციალურ ქსელებში, სიძულვილის ენის შემცველი მასალა ვირუსულად ვრცელდება. შემაშფოთებელია, ისლამოფობიისა და ანტისემიტიზმის მზარდი ტენდენციები, რომელიც კიბერ სივრცეს ცდება და ადამიანების ყოველდღიურობაში ინაცვლებს.